Ikipe ya Real Madrid yanze kumvikana n’ikipe ya Paris Saint Germain ku kugura rutahizamu wayo Kylian Mbappe kuri miliyoni 200 z’amayero ku munsi wa nyuma w’isoko ry’abakinnyi i Burayi. Ubu yamaze kugura Eduardo Camavinga kuri miliyoni 31 z’amayero imukuye mw’ikipe ya Rennes.
Camavinga w’imyaka 18 yasinye amasezerano y’imyaka 6 muri Real Madrid nyuma yaho yemeye ko yananiwe kwegukana Mbappe.
Mbappe yaje muri PSG avuye muri Monaco kuri miliyoni 180 z’amayero, ibi birumvikanisha impamvu PSG yanze kumutanga ku mafaranga ari munsi y’ayo yamuguze.
Mbappe yagiye avuga ko afite intego yo gukinira Real Madrid, mu gihe Real Madrid yananiwe kumugura, ashobora kuzayijyamo kubuntu umwaka utaha amasezerano ye na PSG narangira yabaye umukinnyi wigenga. Mu kwa mbere umwaka utaha, Mbappe azaba yemerewe kugirana amasezerano n’indi kipe azaba yifuza kwerekezamo isoko ry’abakinnyi rifunguye.
Camavinga yavukiye mu nkambi y’impunzi muri Angola ku babyeyi b’abanya-Congo. Umwaka ushize, yabaye umukinnyi wa mbere muto wahagarariye ikipe y’igihugu y’abafaransa nyuma y’imyaka 114 yari afite imyaka 17 yonyine. yazamukiye mu makipe y’abana muri Rennes atangira gukina muri shampiyona ya Ligue 1 ku myaka 16 gusa.
