Perezida w’u Rwanda Paul Kagame kimwe n’abandi bafana bose ba Arsenal F.C ntibashimishijwe n’ibyavuye mu mukino wayihuje na Brentford aho Arsenal yatsinzwe ibitego bibiri ku busa na Brentford FC, ikipe yaherukaga muri Premier League imyaka myinshi ishize.
Uyu mukino niwo wafunguye ku mugaragaro Premier League y’uyu mwaka w’imikino wa 2021/2022, igitego cya mbere cya Brentford cyabonetse ku munota wa 22 gitsinzwe na Sergi Canos, ku munota wa 73 Christian Norgaard yinjiza icya kabiri, Brentford iba yegukanye umukino wayo wa mbere nyuma y’imyaka isaga 75 idakoza ibirenge muri Premier League.
Abafana ba Arsenal hirya no hino ntibishimiye uburyo Arsenal yitwaye mu kibuga, ndetse n’umukuru w’igihugu yagize icyo abivugaho.
Mu magambo ye yanyujije ku urubuga rwe rwa Twitter, Perezida wa Repuburika y’u Rwanda, Paul Kagame yavuze ko Arsenal idaha agaciro mu kubaka ikipe itsinda.
Perezida Kagame yagize ati: “N’umupira,n’ugutsindwa kwa Arsenal kuri Brentford. Brentford yari ikwiriye gutsinda kandi yabigezeho. Umukino ntiwari ku ruhande rwa Arsenal, abafana ntibakwiriye kumenyerezwa ibi. Oya!!! ibi ndabivuga nk’umwe mu bafana bakomeye ba Arsenal. Impinduka zaratinze cyane.
Byabaye urugamba rwimyaka mirongo.. kuzamuka no kumanuka hasi ariko ubu kumanuka kwabaye kwinshi. Ese ntago twagira gahunda ikora bya nyabyo koko?? Igice kimwe cyo kwitaho n’uburyo twitwara kw’Isoko – abakinnyi tugura kugira ngo tugere kuri iyo gahunda. Imyumvire yo kudahozaho ntacyo izageraho.
Ntago tugomba kugira inzitwazo cyangwa ngo twemere kujya hasi. Ikipe igomba kubakirwa ku ntego yo gutsinda gutsinda gutsinda! nubwo twatsindwa, ntitube tubyiteze! ngirango twese tuzi abasigaranye uyu mutwaro uremereye, Nizere ko nabo babizi cyangwa babyemera!!!“
Arsenal imaze igihe ititwara neza dore ko yananiwe gutsinda amakipe yose yahuye nayo mu mikino ya gicuti: yatsinzwe na Tottenham Hotspurs 1-0, itsindwa na Chelsea 2-1, inganya ibitego 2-2 n’ikipe ya Rangers yo muri Scotland ndetse inatsindwa ibitego 2-1 na Hibernian FC.
Arsenal itamerewe neza iritegura guhura n’amakipe akomeye harimo Chelsea bazahura tariki ya 22 Kanama 2021 ndetse na Manchester City tariki ya 28 Kanama 2021.
Tubwire uko ubitekereza mu mwanya wahariwe ibitekerezo.