Guhera mu ijoro ryo kuwa mbere tariki ya 16 Kanama 2021, Imbuga nkoranyambaga zo mu Rwanda zakwirakwiyeho amafoto ya Rocky Kimomo uzwi cyane mu gasobanuye yatereye ivi umukobwa arimo kumwambika impeta, ibi byavugishije benshi kuko yari yaravuze ko adateze gukora ubukwe muri gahunda ya nta gikwe.
Rocky Kimomo usanzwe witwa Uwizeyimana Mark niwe watangije imvugo ya Nta gikwe imaze kwamamara cyane mu rubyiruko ishishikariza abasore bandi kutazakora ubukwe ndetse yongeraho na Nta kudohoka abishimangira.
Ibi nibyo byatangaje abantu cyane babonye amafoto y’ubukwe bwe atangiye gukwirakwira cyane nk’inkongi ku mbuga nkoranyambaga, hari abahise bavuka ya “yaba yadohotse“, ku mbuga zitandukanye harimo Instagram na TikTok abenshi bagiye bamushinja kubashishikariza kudakora ubukwe nyamara we akabaca inyuma akabukora.
Amakuru atugeraho nuko ubu atari ubukwe bwe, ahubwo ari amafoto yavuye mu gikorwa cyo gufata amashusho y’indirimbo yenda gusohoka ya Papa Cyangwe azafatanya na Social Mula.
Amafoto yagiye hanze agaragaza Rocky yateye ivi yambika impeta, nyuma bikagaragara bambaye imyenda y’ubukwe barushinze. Iyi ndirimbo ntibiramenyekana izina ryayo ndetse n’igihe izasohokera.