Umutoza Ole Gunnar Solskjaer yamaze gusohoka muri Manchester United nyuma yo kunanirwa guhesha iyi kipe igikombe mu myaka itatu yose ayimazemo; Michael Carrick niwe wabaye ahawe inshingano by’igihe gito.
Ibi bibaye nyuma y’amezi make gusa Ole ashyize umukono ku masezerano mashya yo gutoza iyi kipe mu yindi myaka itatu, ariko nyuma yo gutsindwa imikino itanu muri irindwi ya Premier League, bikageza aho iyi kipe igera mu myanya y’inyuma.. ubuyobozi bukuru bwa Manchester United bwanze kongera kumuha andi mahirwe.
Uyu mwanzuro wafatiwe mu nama y’ikitaraganya yahuje abayobozi bakuru b’ikipe nyuma yo gutsindwa na Wattford FC ibitego 4 – 1, byamenyekanye ko Ole yirukanwe mu gitondo cyo kuri iki cyumweru.
Manchester United ibinyujije ku rubuga rwayo rwa Twitter, yagize iti “Manchester United itangaje ko Ole Gunnar Solskjaer yavuye ku mwanya we w’ubutoza“
“Ole azakomeza kuba umunyabigwi muri Manchester United, twafashe umwanzuro ugoye. Nubwo imikinire iheruka itari myiza, ntabwo ibyo yakoreye ikipe mu myaka itatu ishize bikwiye kwibagirannwa mu kubaka imizi yo gutsinda by’igihe kirekire“
Umwaka ushize w’imikino, Manchester United yarangije iri ku mwanya wa 2 ndetse nyuma yo gusinyisha abakinnyi bakomeye cyane barimo Cristiano Ronaldo, Raphael Varane na Jadon Sancho, abafana n’abayobozi b’ikipe bari biteze igikombe muri uyu mwaka ariko siko byagenze.
Ubuyobozi bw’ikipe bwamushimiye ko yagerageje kuzamura ikipe akayikura ku rwego yayisanzemo ubwo yajyaga ku mwanya w’ubutoza mu 2018.
Ninde uzasimbura Ole kuri uyu mwanya?
Amakuru ava mu ikipe avuga ko Manchester United idateganya guhita ishaka undi mutoza vuba, ahubwo izashaka uw’igihe gito uzafata inshingano kugeza shampiyona y’uyu mwaka irangiye.
Bivugwa umutoza Luis Enrique Martínez García yaba yiteguye kugirana ibiganiro n’uburobozi bw’ikipe, ndetse bivugwa ko ashigikiwe na Cristiano Ronaldo uvuga ko ariwe waba ushoboye kuyobora Manchester United ku buryo yahangana na Manchester City, Liverpool na Chelsea.
Ikibazo cya Enrique n’uko ari gutoza ikipe y’igihugu ya Spain ubu yamaze gukatisha itike y’igikombe cy’Isi, ubu biragoye kwemeza ko yafata ikipe mugihe habura amezi make ngo igikombe cy’Isi gitangire.
Abandi batoza bari gushyirwa mu majwi harimo: Zinedine Zidane umaze igihe atagira ikipe kuva yasohoka muri Real Madrid, Brendan Rodgers utoza Liecester nubwo aheruka gucecekesha ayo makuru avuga ko yishimye muri Liecester.
Abayobozi bakuru ba Manchester United kandi bishimira cyane umutoza Mauricio Pochettino wa Paris Saint-Germain bishoboka ko nawe ashobora kugerwaho.