Nyuma yo gutandukana na Juventus kuwa gatanu ndetse bigahita byemezwa ko azerekeza muri Manchester United, Cristiano Ronaldo yamaze gukora isuzuma-mubiri mugihe ategerejwe i Manchester.
Amasezerano y’imyaka 2 niyo yemejwe hagati ya Ronaldo na Manchester United, amasezerano azarangizwa neza mbere yuko isoko ry’igura n’igurishwa ry’abakinnyi rifunga kuri uyu wa kabiri kumugoroba.
Manchester United izishyura asaga miliyoni 15 z’amayero hiyongereyeho miliyoni 8 z’inyongera, ndetse yamaze gukora amasuzuma y’ubuzima mu mujyi wa Lisbon aho aherereye ubu.
Cristiano Ronaldo yatsinze ibitego 118 mu mikino 292 yakiniye Manchester United kuva muri 2003 na 2009.
Gusohoka kwa Cristiano Ronaldo muri Juventus byatangajwe kuwa gatanu (27 Kanama 2021) nyuma yuko atangarije perezida wayo Massimiliano Allegri ko atagishaka gukinira iyi kipe.
Ikipe ya Manchester City niyo yari yabonye amahirwe yo kwegukana uyu rutahizamu w’ibihe byose ariko iyi kipe yikura mu biganiro.
Nyuma y’umukino wahuje Manchester United na Wolves yatsinzemo igitego 1-0 cya Mason Greenwood, umutoza Ole Gunnar Solskjaer yakiriye Ronaldo mu ikipe ndetse yishimira ibyo yakoreye ikipe.
Solskjaer yavuze ati “Twizeye ko ibijyanye n’amasezerano bizasozwa vuba tukamwakira, abakinnyi baramwishimiye ndetse nanjye nishimiye ko agiye kwiyongera ku ikipe ikomeye dufite.”
Ku bavuga ko Cristano Ronaldo akuze cyane umutoza Solskjaer yavuze ati “Tuzi uburyo Ronaldo yari igihangage igihe yarakiri hano, ubuhangage bwe bwariyongereye cyane ndetse aba umukinnyi ukomeye, azabereka icyo ashoboye!”.
Solskjaer akomeza abwira abakinnyi basanzwe mu ikipe ko Ronaldo azajya ajya mu ikipe ibanza.
Ubu Cristiano Ronaldo aherereye muri Portugal aho Juventus ifite imikino 3, umukino we wa nyuma uzaba kuri uyu wa kabiri.