Amakuru avuga ko bamwe mu bakinnyi bibanze ba Manchester United batishimiye imikorere y’umutoza wabo Ole Gunnar Solskjaer nyuma yuko iyi kipe inganyije igitego 1-1 na Everton kuri Old Trafford.
Anthony Martial niwe wafunguye amazamu mbere yuko igice cya mbere cy’umukino kirangira, ariko Andros Townsend ukinira Everton yaje kicyishyura birangira amakipe yombi anganyije, ibitashimishije abafana ba Manchester United.
Manchester United imaze gutsinda imikino ibiri gusa mu mikino itanu imaze gukina mu marushanwa yose.
Solskjaer uheruka gusinya andi masezerano yo gutoza iyi kipe, ashyigikiwe n’ubuyobozi bukuru bwa Manchester United, ariko abakinnyi be b’inkingi ya mwamba ntibishimye.
Ikinyamakuru The Daily Telegraph kivuga ko Cristiano Ronaldo na Paul Pogba bari mu bakinnyi 5 ba Manchester United batishimiye Solskjaer , Nyuma y’umukino wo kuwa 6 bagaragaje uburakari ubwo bari bamaze kunganya n’ikipe itakagombye kubatsindira ku kibuga cyabo kuri Old Trafford.
David Degea, umuzamu mukuru wa Manchester United ntako atagize ariko birangira ikipe ye yishyuwe igitego yari yatsindiwe na Anthony Martial.
Abafana ba Manchester United bategereje umusaruro ku bakinnyi bashya binjiye mu ikipe muri iyi mpeshyi. Jadon Sancho ukiri kugerageza kugirira ikipe ye umumaro yisanze akinishwa ku mwanya atamenyereye dore ko asanzwe akina neza anyura mu ruhande rw’iburyo ariko umutoza Solskjaer amukinisha ku ruhande rw’ibumoso.
Umutoza Ole Gunnar Solskjaer umaze iminsi yotswa igitutu kubera imikinire y’ikipe ye, mu minsi mike ishize byari byatangiye guhwihwiswa ko ashobora kwirukanwa ariko inama nkuru y’ubuyobozi ya Manchester United yatoye ko akomeza gutoza iyi kipe.
Nyuma y’umukino na Everton, umutoza Ole Gunnar Solskjaer yavuze ko ikipe ye yakinnye neza icyabuze ari igitego cya kabiri gusa, mu magambo ye yagize ati “Twari dufite abakinnyi beza inyuma y’umupira ariko, hari imyanzuro mibi twafashe idushyirishamo muri ariya masegonda 10..“
“Uyu munsi twihariye umukino, ahubwo nuko tutashoboye gutsinda igitego cya kabiri buri wese aba akeneye mu mikino nkiyi. Ikipe nka Everton nkuko tuyizi kuva umwaka ushize ni ikipe ishobora gutsinda igitego utari witeguye.”
Manchester United izagaruka mu kibuga muri Premier League kuwa 16/09/2021, aho izakirwa na Leicester City kuri sitade ya King Power, birashoboka ko uyu mutoza azagiraibyo akosora ikipe ye ikabona insinzi ikwiriye.