Kuva mu cyumweru gishize mu mujyi wa Shanghai hashizweho guma mu-rugo mu rwego rwo kugabanya ikwirakwizwa ry’ubwandu bwa Covid-19, ni nyuma yuko habonetse ubwandu bwinshi cyane butari bwarigeze bugaragara muri uyu mujyi.
Guma murugo mu mujyi wa Shanghai yari yashyizweho igomba kurangira kuri uyu wa kabiri ariko yongerewe igihe ndetse birahwihwiswa ko ishobora kumara igihe kinini dore ko umubare w’abandura batagaragaza ibimenyetso watumbagiye muri iyi minsi.
Kuwa 4 z’ukwezi kwa Mata, Mu mujyi wa Shanghai hagaragaye ubwandu bushya bwa Covid-19 burenga 13.086 ndetse igiteye ubwoba nuko abanduye bose nta kimenyetso bagaragaza nkuko byatangajwe n’ubuyobozi bw’uyu mujyi, ni nyuma y’uko abantu barenga miriyoni 25 bapimwe mu masaha 24.
Ibi bibaye mugihe umubare w’ ubwandu bwa Covid-19 bugaragaza ibimenyetso wagabanutse cyane kugera kuri 268.
Kugera ubu abakozi basaga 38.000 bo mu nzego z’ubuzima hirya no hino mu gihugu nibo bamaze koherezwa mu mujyi wa Shanghai. Ubuyobozi bwatangaje ko hagiye gushyirwaho izindi ngamba zikarishye ndetse buri muturage wese agapimwa.
Ibi ni intebutsa kubatekereza ko kuba Covid-19 itakivugwa yashize burundu.
– Reuters