Mu gikorwa kiswe icy’amateka, ishami ry’umuryango w’abibumbye ryita ku buzima World Health Organization(WHO) ryatangaje kuri uyu wa gatatu ko rishishikariza ikoreshwa ry’urukingo rwa mbere ndetse arirwo rumaze kuboneka rwonyine rwa Malaria, uru rukingo ruzatangirira ‘mu bana bo muri Africa munsi y’ubutayu bwa Sahara akaba ariho hakiri Malaria nyinshi cyane.
WHO yafashe iki cyemezo nyuma y’ibisubizo byaturutse mu bushakashatsi kuri uru rukingo buri gukorerwa mu bitaro by’abana muri Ghana, Kenya na Malawi nkuko bitangazwa na WHO.
Iyi gahunda yo gutera abana urukingo yatangiye mu 2019, ndetse ubu imaze kugera ku bana 800,000, ibi byagaragaje ko uru rukingo rwitwa RTS,S/AS01 cyangwa Mosquirix rwizewe. Nkuko WHO yabitangaje, uru rukingo ruratekanye kandi rurahendutse, ndetse rugabanya ubukana bwa malaria ku kigero cya 30%.
Umukuru wa WHO, Tedros Adhanom Ghebreyesus yavuze ko uburyo busanzwe bwo kwirinda malaria hamwe n’uru rukingo bizafasha mu kurokora ubuzima bw’abana bato barenga ibihumbi buri mwaka.
WHO ivuga ko uru rukingo ruzakoreshwa mu gufasha mu kurinda abana bato malaria, urukingo rushobora kuzajya rutangwa muri doze enye ku bana bafite byibura amezi atanu.
Malaria ni indwara ikwirakwizwa n’umubu w’ingore witwa Anopheles. Iyi ni indwara ivurwa igakira ndetse ishobora kwirindwa ariko ni imwe mu mpamvu y’uburwayi n’imfu mu bana bari munsi y’imyaka 5 batuye muri Africa yo munsi y’ubutayu bwa Sahara. WHO ivuga ko abana bafite imyaka iri hasi y’itanu barenga 260,000 bapfa buri mwaka bazize malaria.
Inyigo zakozwe n’inzobere igaragaza ko uru rukingo rurinda malariya ku kigero cya 39% mu mpnja zifite hagati y’amezi 5 na 17. Ariko ubushakashatsi bwisumbuyeho bugaragaza ko ubushobozi bw’uru rukingo bugenda bugabanuka uko igihe kigenda gishira.
Abinyujije ku rubuga rwe rwa Twitter, umuyobozi mukuru wa WHO yagaragaje ibyishimo ubwo yatangazaga amakuru, ati “Uru ni urukingo rwakorewe muri Africa n’abanyafurika” yakomeje ashimira abashakashatsi bo kuri uyu mugabane hiyongereyeho ikigo gikora imito cyo mu bwongereza cya GlaxoSmithKline kubera uruhare bagize mu ikora ry’uru rukingo mu myaka isaga 30 ishize.. yanashimye umuryango wa Bill and Melinda Gates Foundation kuba waragize uruhare rukomeye mu gutera inkunga uyu mushinga.
Matshidiso Moeti uhagarariye ishami ryo mu karere rya WHO yagize ati “Twari tumaze igihe kinini dutegereje urukingo none ubu dufite urukingo rushobora gukoreshwa ku buryo busesuye.”