Umutwe w’iterabwoba wa ‘Islamic State’ wamaze gutangaza ko ariwo wihishe inyuma y’ibitero byaguyemo abasirikare 7 barimo n’uwari umuyobozi wabo muri leta ya Borno iherereye mu majyaruguru ya Nigeria.
Amakuru avuga ko abarwanyi ba ‘Islamic State’ bagabye igitero ku birindiro by’ingabo za Nigeria mu gitondo cyo kuwa gatanu(tariki 3 Ukuboza) ahagana Saa saba z’ijoro. Nk’uko amakuru abivuga, ukurasana kwabaye nk’uguhagaze abasirikare bari berekeje mu mujyi bagwa mu gatego baricwa.
Ibi bibaye nyuma y’ukwezi kumwe gusa izi nyeshyamba zishe umu-general mu gisirikare cya Nigeria muri leta ya Borno.
Hashize imyaka irenga 12 igisirikare cya Leta ya Nigeria gihanganye n’inyeshyamba ziyitirira idini ya isilamu mu majyaruguru y’uburasirazuba bwa Nigeria. Ibi bitero bikorwa cyane cyane n’inyeshyamba zo mu mitwe ya ‘Boko Haram’ n’ishyami rya Islamic State ryo mu burengerazuba bwa Africa rizwi nka ‘ISWAP’.
Umuryango w’abibumbye, UN utangaza ko kugeza muri 2020 byibura abantu basaga 350,000 aribo bamaze kugwa muri aya makimbirane.