Uwahoze ari perezida wa Leta zunze ubumwe za Amerika, Donald Trump yagaruwe ku rubuga rwa Twitter.
Trump yakuwe kuri uru rubuga umwaka ushize ubwo amagambo ye yanditse kuri uru rubuga yateje umutekano muke ku ngoro nshingamategeko ya amerika izwi nka “US Capitol”. Yagaruwe kuri Twitter nyuma yuko nyiri uru rubuga akaba n’umuyobozi warwo Elon Musk yanditse asaba abamukurikira gutora nimba Donald Trump yakomorerwa.
Byarangiye abakoresha Twitter barenga miliyoni 15 batoye muribo 52% bemeje ko Donald Trump yagarurwa, mugihe 48% batemeranyije nuyu mwanzuro.
Kugeza ubu Donald Trump ntacyo aratangaza nimba azongera gukoresha Twitter, dore ko nawe yubatse urubuga nkoranyambaga yise “Truth Social” ndetse abarukoresha bemeza ko rusa cyane nka Twitter.
Ibi bibaye nyuma y’iminsi mike Donald Trump yemeje ku mugaragaro ko azongera kwiyamamariza ku mwanya wa perezida wa Amerika mu matora azaba mu 2024, ndetse ku kuba yakomorewe kuri Twitter bimuha amahirwe menshi yo kubona ijwi mu kwiyamamaza.
