Cristiano Ronaldo ntajya abura mu makuru igihe kinini, nyuma yo kugaruka muri Manchester United, yongeye gukora amateka n’ikipe ye ya Portugal ndetse ubu arishimira agahigo yaciye ka Guinness World Record.
Uyu mukinnyi w’imyaka 36 y’amavuko yifashishije imbuga nkoranyambaga yemeza ko yaciye agahigo ko kuba umukinnyi watsinze ibitego byinshi mu ikipe y’igihugu.
Kuwa 1 Nzeri 2021, Ronaldo yujuje ibitego 111 yatsindiye ikipe ya Portugal nyuma y’umukino wayihuje na Ireland.
Aka gahigo kari gasanganwe n’umukinnyi Ali Daei wakanyujijeho muri Iran, yatsindiye igihugu cye ibitego 109 hagati y’imyaka ya 1993 na 2006, ubu Ronaldo niwe wegukanye aka gahigo.
Cristiano Ronaldo aka siko gahigo konyine afite, Ronaldo niwe mukinnyi watsinze ibitego byinshi mw’irushanwa rya UEFA Champions League (yatsinzemo ibitego 137), Ronaldo kandi niwe mukinnyi watsinze ibitego byinshi muri season imwe aho yatsinze ibitego 17 wenyine.
Cristiano Ronaldo agaragaza ko adateze guhagarika kuba igihangage muri ruhago vuba aha, ubu yamaze kugera mu bwami bw’Abongereza i Manchester aho agiye gukinira ikipe ya Manchester United.