Inzu ikoreramo umukuru w’igihugu wa Amerika izwi nka The White House, yasohoye urutonde rw’imbuga nkoranyambaga zagize uruhare mw’igabanuka ry’abiteza urukingo rwa Covid-19 muri USA, White House ivuga ko izo mbuga zitashize imbaraga mu gukumira amakuru y’ibihuha azinyuzwaho.
Ibi bije hashize icyumweru perezida Biden yise ‘abicanyi’ Facebook ndetse n’izindi company zifite imbuga nkoranyambaga.
Umwe mu bayobozi bakuru muri White House yavuze ko ikibazo gikomeye ari ingamba zidahamye zifatwa n’izo sosiyete. YouTube na Facebook nka bimwe mu byatunzwe agatoki, byagiye bishiraho ingamba zo gukumira ibihuha ariko ibisubizo bivamo ntibiba bishimishije.
Amwe mu makuru y’ibihuha akunze gushyirwa kuri izi mbuga ni avuga ko izi nkingo zidashoboye kurinda abaziteza, Hari n’abavuga ko ngo zirimo utwuma tuzwi nka microchip dushobora no guteza ubugumba mu bagore. Ayo makuru ni ibihuha bidafite aho bishingiye.
Muri raporo iherutse gushirwa hanze na Center for Countering Digital Hate (CCDH), ikigo kirwanya urwango kuri interineti, yerekana amakonti 12 ari kw’isonga aho amaze gukwirakwiza bibiri bya gatatu by’amakuru arwanya inkingo za Covid-19. 6 muri yo akorera kuri YouTube kandi arakurikirwa cyane.
Umuvugizi wa YouTube, Elena Harnandez yatangaje ko kuva muwa gatatu umwaka ushize, hamaze gusibwa amashusho arenga 900,000 akwirakwiza ibihuha kuri YouTube, ndetse yongeraho ko basibye amakonti yavuzwe muri raporo ya CCDH.
Umuvugizi wa Facebook, Kevin McAlister, yatangaje ko kuva icyorezo cyatangiza, Facebook yasibye amakuru y’ibihuha arenga miliyoni 18. Facebook ibinyujije ku rubuga rwayo (blog) yasabye ko gutungwa agatoki na guverinoma byahagarikwa kuko ikora ibishoboka igakangurira abayikoresha kwikingiza
Source: Thompson Reuters