Umuhanzi Nyarwanda wamenyekanye nka Yago pon dat , ku nshuro ye ya mbere yakoze igitaramo cyo kumurika Album ye ya mbere nyuma y’umwaka umwe gusa yinjiye mu gukora umuziki nkuwabigize umwuga abifatanya no kuba umunyamakuru.
Igitaramo cya Yago pon dat , akaba ari igitaramo kitabiriwe ku rwego rwo hejuru bitandukanye n’uko bamwe bari babyiteze doreko ari igitaramo abakoresha imbuga nkoranyambaga hano mu Rwanda bavugaga ko gishobora kutabona abantu bakitabira ibihabanye n’uko cyagenze.
Yago , akaba yaramuritse album ye ya mbere yise “Suwejo” yitiriye indirimbo ye ya mbere yakoze akinjira mu muziki , nyuma y’uko akoze indirimbo nyinshi zigiye zitandukanye zirimo Suwejo , umuhoza ndetse n’izindi yahuriyemo n’abandi bahanzi barimo n’umuraperi Bushali.
Yago , muri iki gitaramo kandi akaba yarashyikirije ababyeyi be impano y’ifoto y’umukuru w’igihugu Perezida Paul Kagame ndetse anabashimira kuba baramubereye ababyeyi ubundi abasezeranya ko agiye kubafasha nabo bagatura mu mujyi wa Kigali.
Abahanzi batandukanye kandi bari batumiwe n’uyu muhanzi Yago pon dat bakaba baragaraye muri iki gitaramo cye uretse umuhanzi uri mu bakomeye hano mu Rwanda Chris eazy utarakigaragayemo aho ubuyobozi bushinzwe kureberera inyunguza ze bwaje no gusobanura impamvu atakitabiriye.
Iki gitaramo kandi kikaba cyaraje no kugaragamo umwuka utari mwiza hagati y’umuvanga miziki ndetse n’abahanzi bari baturutse mu gihugu cy’u Burundi basa nkaho hari ibyo batumvikanaho ariko biza gukemuka igitaramo kibasha kugenda neza ntankomyi.
Yago pon dat , akaba ari umwe mu bahanzi nyarwanda bari ku rwego rwiza bari kuzamuka ijoro n’amanywa mu muziki w’u Rwanda , nyuma y’umwaka umwe gusa atangiye uyu muziki ndetse agasohora indirimbo nyinshi kandi nziza buri wese yakunda kumva.