Umukinnyi wa filme Vin Diesel yandikiye mugenzi we Dwayne Johnson (uzwi nka The Rock) amusaba kugaruka mu muryango wa ‘Fast & Furious’.
Vin Diesel w’imyaka 54 ukina muri filme za ‘Fast & Furious’ yifashishije ibaruwa ifunguye igenewe mugenzi we The Rock yanyujije ku rukuta rwe rwa Instagram, yagize ati “muvandimwe wanjye muto…. igihe cyageze, Isi itegereje ‘finale’ ya Fast & Furious.”
Muri ubu butumwa, Vin Diesel yahishuye ko abana be bita The Rock marume(tonto) wabo nubwo ibi byamamare byombi bizwiho kuba bifitanye amakimbirane amaze imyaka yatumye The Rock ahagarika kugaragara muri izi filme ndetse akaba ataragaragaye mu iheruka gusohoka yitwa ‘F9’.
Dwayne Johnson(The Rock) yagaragaye bwa mbere muri izi filme mu gice cya 5 kiswe ‘Fast 5’ mu 2011, akinamo ari umupolisi witwa Like Hobbs, ndetse kuva ubwo akina no mu bindi bice byakurikiye harimo icya 6, 7 na 8 nyuma akina muri filme yiswe ‘Hobbs & Shaw’ mu 2019 itaragaragayemo Vin Diesel.
Amakimbirane hagati ya Johnson na Vin Diesel yatangiye mu mwaka wa 2016 mu bihe bya nyuma byo gufata amashusho ya filme ‘The fate of the furious(7)’ ubwo Johnson yashyiraga ifoto ku rubuga rwe rwa Instagram yibasira undi mukinnyi wa filme atavuze mu izina.
Iyo foto yari iherekejwe n’amagambo agira ati “Bamwe mu bagabo dukinana filme bigira nk’abageze iyo bajya ndetse bakifata nk’abanyamwuga, mugihe abandi bituriza.”. Itangazamakuru ryafatiye hejuru ubu butumwa ritangaza ko ari Vin Diesel wavugwaga.
Johnson aherutse gutangariza ikinyamakuru ‘Vanity Fair’ ko yashwanye na Vin Diesel kubera ko imikorere yabo n’imyitwarire yabo byari bihabanye cyane, ndetse ibitekerezo byabo mu gukora filme ntibyahuraga.
Johnson aherutse gutangariza ‘The Hollywood Reporter’ muri uyu mwaka ko adateze kugaruka muri Fast & Furious, ariko birasa nkaho Vin Diesel yiteguye ko iby’ahashize babisiga inyuma bityo agashobora kubika isezerano yagiriye inshuti ye Paul Walker nawe wakinaga muri izi filme kugera atabarutse mu mwaka wa 2013 ryo guha Fast & Furious iherezo rizima.
Ubutumwa bukomeza bugira buti “Narahiriye ko nzaha Fast&Furious ‘finale’ nziza izaza mu gice cya 10” “Ibi mbivuganye urukundo.. ariko ukwiye kugaruka kuko ufite umwanya ukomeye wo gukinamo, ntawundi wakina ari Hobbs. nizere ko uzakurikira igeno ryawe.”
Kugera ubu Dwayne Johnson(The Rock) ntacyo yari yabivugaho.