Rutahizamu wa Manchester United Cristiano Ronaldo hari amakuru avuga ko yigeze kwibwa akayabo kangana na 288,000€ (akabakaba miriyoni 344) n’umukozi ukorera sosiyete imufasha mu ngendo ze.
Bivugwa ko umugore witwa Maria Silva ubiri inyuma yizewe agahabwa amakuru ajyanye n’amakarita yo kwishyuriraho Cristiano Ronaldo akoresha ndetse n’imibare y’ibanga(PIN) yayo, kuva ubwo mu gihe cy’imyaka itatu yatangiye kujya yikoreramo.
Amakuru dukura mu kinyamakuru ‘Jornal de Noticias’ avuga ko aya mafaranga yose yanyerejwe ashyirwa ku ngendo zirenga 200 Ronaldo atigeze akora.
Cristiano Ronaldo siwe wenyine wibwe n’uyu mugore kuko n’umu-agent we Jorge Mendes nawe yibwe, ndetse mu bibwe harimo abandi bakinnyi Nani na Manuel Fernandes.
Uyu mugore w’imyaka 53 yafashwe amaze kwiba amafaranga asaga ibihumbi 350 by’amayero (akabakaba 417,500,000Frw) akatirwa imyaka 4 y’igifungo muri gereza.
Bivugwa ko kandi uyu mugore yifashishije ikarita ya Cristiano Ronaldo akishyura ingendo 27 z’umukinnyi w’umunya-Portugal Thiago Mendes aho yabaga avuye mu mijyi ya Lyon(France), Madrid ndetse na Turin mu Butariyani aho yagiye akinira amakipe y’aho.