Urwego rw’igihugu rw’ubugenzacyaha , RIB , rwahakanye amakuru yacicikanye ku mbuga nkoranyambaga y’uko hari Minisitiri watawe muri yombi afatiwe mu cy’uho yakirira ruswa , nkuko byavugwaga n’abakoresha imbuga nkoranyambaga.
Mw’ijoro ryo ku cyumweru , tariki 21 Gicurasi 2023 , akaba aribwo abakoresha imbuga nkoranyambaga by’umwihariko urubuga rwa Twitter batangiye kuvugako haba hari Minisitiri w’umugore urwego rw’igihugu rw’ubugenzacyaha , RIB , rwataye muri yombi afatiwe mu cy’uho yakirira ruswa.
Amakuru akaba yaracicikanye avugako uwo mu Minisitiri w’umugore watawe muri yombi yaba ari Minisitiri wa Siporo , Aurore Mimosa Munyangaju , ndetse ngo urwego rw’igihugu rw’ubugenzacyaha , RIB , rukaba rwaramufatiye kuri hotel ari mu modoka ye arimo kubara amafaranga y’indonke yaragiye kwakira.
Gusa nyuma y’aya makuru yakomeje gucicikana ku mbuga nkoranyambaga , umuvugizi w’urwego rw’igihugu rw’ubugenzacyaha RIB , Dr Murangira B Thierry , akaba yarahakanye iby’aya makuru y’uko hari minisitiri watawe muri yombi ndetse anemerera itangazamakuru ko nta na minisitiri ufunzwe ukurikiranyweho icyo cyaha cya ruswa.
Nyuma y’aya makuru , ku mugoroba wo kuri uyu wa kabiri akaba aribwo minisitiri wa siporo, Aurore Mimosa Munyangaju , yongeye kugaragara mu ruhame akurikiranye umukino wa basketball ubona afite akanyamuneza mu maso , nyuma y’ibyacicikanye ko yatawe muri yombi.
Minisitiri , Aurore Mimosa Munyangaju , akaba yagaraye mu ruhame akurikiranye umukino wa basketball bisankaho ari umuntu wishimye ndetse nyuma aza no gutanga ikiganiro n’itangazamakuru cyagarutse kubufatanye bwa NBA Africa ndetse na Goverinoma y’u Rwanda.