Kuwa gatatu tariki 21 Nzeri 2022 , nibwo Bamporiki Eduard wahoze ari umunyamabanga wa leta muri Minisiteri y’urubyiruko n’umuco yongeye kugaragara imbere y’urukiko rw’isumbuye rwa Nyarugenge , nyuma y’uko tariki 16 Nzeri 2022 , urubanza rwe rwari rwasubitswe.
Bamporiki Eduard wahoze muri Goverinoma y’u Rwanda ukurikiranyweho icyaha cyo kwakira indonke , mu rukiko ubushinjacyaha bwagaragajeko Bamporiki Eduard yatse indonke ya miliyoni 10 umuturage wari ufite uruganda rwafunzwe kubera kutuzuza ibisabwa , amwizeza kuzamufasha rukongera gufungurwa.
Mu rukiko , uruhande rw’uwuregwa ariwe Bamporiki Eduard abanyamategeko be batangiye urubanza bagaragaza inzitizi , bavugako umukiriya wabo (Bamporiki Eduard) atakabaye aburanishwa n’urukiko rw’isumbuye rwa Nyarugenge ahubwo ko umukiriya wabo yakabaye yarahereye urubanza rwe mu rukiko rw’ibanze.
Umunyamategeko wa Bamporiki Eduard kandi yabwiye urukiko ko ikirego umukiriya we akurikiranyweho kitagakwiye kuba kimuzana mu nkiko ngo kuko ari ikibazo cy’uruganda rwafunzwe n’umujyi wa Kigali kandi umukiriya we igihe urwo ruganda rufungwa yari umunyamabanga wa leta muri Minisiteri y’urubyiruko n’umuco.
Ndetse umunyamategeko we yakomeje avugako muri iki kirego umukiriya we akurikiranywemo arengana ngo kuko we icyo yakoze ari uguhuza umuyobozi wungirije w’umujyi wa kigali ushinzwe imyubakire n’imiturire mu mujyi wa kigali ndetse na nyiri gufungirwa uruganda , kugirango baganire barebeko urwo ruganda rwafunzwe rwakongera gufungurwa.
Umunyamategeko wa Bamporiki , kubyo kwakira indonke (ruswa) ashinjwa muri uru rubanza , yavuzeko amafaranga umukiriya we ashinjwa ko yatse y’itwaje kari umuyobozi , ko ari ishimwe yakiriye ahawe na nyiri gufungirwa uruganda , amushimira kubwo kumufasha uruganda rwe rukaba rwakongera gufungurwa ko ntaho bihuriye no kuba yarayatse y’itwaje kari umuyobozi.
Ubushinjacyaha bukaba bwasobanuriye birambuye urukiko dosiye Bamporiki Eduard akurikiranyweho maze busaba urukiko rw’isumbuye rwa Nyarugenge kuzahamya ibyaha Bamporiki Eduard akurikiranyweho rukamuha igifungo cy’imyaka 20 ndetse n’amande ya miliyoni 200 z’amafaranga y’u Rwanda.
Bamporiki Eduard , asabwe kugira icyo avuga ku bihano yasabiwe n’ubushinjacyaha , akaba yaravuzeko icyo gihano ari kinini , avugako ataba akibasha gukorera igihugu cye kandi kurubu akibishoboye , urukiko rw’isumbuye rwa Nyarugenge rukaba rwanzuyeko urubanza ruzasomwa tariki 30 Nzeri 2022 , kw’isaha ya saa Munani zo mu Rwanda.