Igisirikare cya Israel cyivuganye umuyobozi mukuru wungirije kurwego rwa politike mu mutwe wa Hamas , Saleh Al-Arouri , mu gitero cyakozwe n’indege zitagira abapirote mu majyepfo y’umurwa mukuru w’igihugu cya Liban , Beirut.
Sahel Al-Arouri , muri iki gitero cyakozwe n’indege zitagira abapirote (drone) akaba yariciwe hamwe n’abandi bantu batandatu barimo ba komando babiri b’umutwe wa Hamas ndetse n’abandi barwanyi bane b’uyu mutwe wa Hamas.
Uyu muyobozi wo kurwego rwo hejuru mu mutwe wa Hamas gutya , akaba ariwe wa mbere igisirikare cya Israel kibashije kwivugana kuva cyatangiza intambara n’uyu mutwe wa Hamas mu ntara ya Gaza kuri ubu imaze guhitana abasiviri barenga ibihumbi 22,000.
Umuyobozi mukuru w’umutwe wa Hamas kurwego rwa politike , Ismail Haniyeh , akaba yamaganiye kure iki gitero cyakozwe na Israel kikagwamo umwungiriza we Saleh Al-Arouri , ubundi avugako gukora iki igitero ko ari igikorwa cy’ubugwari n’iterabwoba ndetse no kuvongera ubusigire bw’igihugu cya Liban.
Umutwe wa Hezbollah usanzwe ugirana imikoranire n’umutwe wa Hamas , ufite ibirindiro muri Liban ukaba waramaganye iki gitero ndetse utangazako bitazarangiriraho gusa , ahubwo uvugako Israel izahura n’ingaruka z’iki gitero yakoze ku butaka bwa Liban.
Umuvugizi w’igihugu cya Israel , Mark Regev , akaba yaranze kwemera ko Israel ariyo yakoze iki gitero cyayitanye uyu muyobozi wo kurwego rwo hejuru mu mutwe wa Hamas ariko yemezako ari igitero cyari kigambiriye abayobozi b’umutwe wa Hamas , atari igitero ku gihugu cya Liban.
Saleh Al-Arouri w’imyaka 57 wiciwe muri iki gitero akaba yari umuyobozi wungirije ku rwego rwa politike mu mutwe wa Hamas , ushinzwe guhuza ibikorwa by’uyu mutwe n’umutwe wa Hezbollah usanzwe ufitanye imikonire na Hamas.