Umukuru w’igihugu , Perezida Paul Kagame yakiriye mugenzi we w’igihugu cya Hungary Perezida Katarin Novak , uri mu ruzinduko rwe rw’akazi mu Rwanda , rukaba n’uruzinduko rwe rwa mbere nka Perezida w’igihugu cya Hungary akoreye muri Africa.
Ku gicamutsi cyo kuri ik’icyumweru , tariki 16 Nyakanga 2023 , Perezida Katarin Novak akaba aribwo yageze mu Rwanda ubundi akakirwa n’umukuru w’igihugu Perezida Paul Kagame mu biro bye village urugwiro ndetse bakagirana ibiganiro.
Ubwo yakirwaga na Perezida Paul Kagame , Perezida Katarin Novak akaba yavuzeko ari ku nshuro ye ya mbere asuye umugabane wa Africa ubundi avugako impamvu yayisemo guhera mu Rwanda byari ukungirango yihere ijisho uburyo u Rwanda rwazamutse mw’iterambere.
Umukuru w’igihugu , Perezida Paul Kagame , akaba yavuzeko igihugu cy’u Rwanda vubaha kigiye gufungura ambassande mu gihugu cya Hungary mu rwego rwo gukomeza ndetse no kurushaho guteza imbere umubano uri hagati y’ibihugu byombi , Hungary n’u Rwanda.
Perezida Katarin Novak , ubwo yagarukaga ku kibazo cy’abimukira cyugarije uburayi , akaba yavuzeko igihugu cye cya Hungary kigiye gufatanya n’u Rwanda mu guhangana n’iki kibazo cy’abimukira ibihugu byo ku mugabane w’iburayi bikomeje guhangana nacyo.
Perezida Kagame ubwo yagarukaga ku ntambara y’uburusiya na Ukraine , akaba yongeye kuvugako kuba impande zombi zikomeje kurwana , abandi bagakomeza batanga intwaro , bumvako hari uruhande ruzatsindwa muri iy’intambara bishobora gutwara igihe kirekire kandi ibyangiritse bikaba byinshi cyane.
Akaba yakomeje avugako hakwiye kwibazwa mugihe iy’intambara yakongera kumara imyaka ibiri cyangwa itatu uko byaba bimeze , ubundi avugako hakwiye gutekereza neza ku babifite ububasha , n’abafite uruhare muri iy’intambara avugako ikigaragara buri wese ufite uruhare muri iy’intambara azagira icyo yigomwa ndetse akagira n’icyo yungukiramo.
Perezida Katarin Novak akaba ari mu Rwanda mu ruzinduko rwe rw’akazi aho ari ku mugabane wa Africa mu ruzinduko rwe rwa mbere kuri uy’umugabane nka Perezida w’igihugu cya Hungary , igihugu kibarizwa mu muryango w’ibihugu bigize ubumwe bw’uburayi.
