Kuri iki cyumweru tariki 12 Kamena 2022 , umunyarwanda Mugisha Moise ukina umukino wo gusiganwa ku magare agakinira ikipe ya Pro Touch yo mu gihugu cya Africa y’epfo yegukanye isiganwa rya tour du Cameroon 2022 , nyuma yo kuyobora abandi bari bahanganye mu gihe k’icyumweru banyonga amagare.
Mugisha Moise akaba yongeye kwegukana isiganwa rya Tour du Cameroon muri iki gihugu cya Cameroon nyuma yuko mu mwaka wa 2020 nanone uyu musore yari yegukanye isiganwa rikomeye rya Grand Prix Chantal Biya naryo rikinirwa muri iki gihugu cya Cameroon.
Mugisha Moise akaba ari umunyarwanda wa kabiri ubashije kwegukana isiganwa rya tour du Cameroon nyuma yuko mugenzi we Uwizeyimana Bonaventure nawe yari yegukanye iri siganwa rya Tour du Cameroon mu mwaka wa 2018 , asize abandi bahatanaga.
Tour du Cameroon akaba ari rimwe mu masiganwa akomeye muri Africa abanyarwanda bakina umukino wo gusiganwa ku magare bamaze gutwara inshuro nyinshi nyuma y’isiganwa tour du Rwanda batwaye inshuro nyinshi , aho bamaze gutwara inshuro 2 isiganwa rya tour du Cameroon mu mwaka wa 2018 n’uyu mwaka wa 2022.
Mugisha Moise akaba aherutse kuba umunyarwanda wa mbere wegukanye agace k’isiganwa rya Tour du Rwanda kuva iri siganwa rya Tour du Rwanda ryashyirwa ku rwego rwa 2.1 , aho yegukanye agace kanyuma ka Tour du Rwanda umwaka wa 2022.
