Umuhanzi w’umunya-tanzania Diamond Platnumz uherutse gusohora indirimbo ye yise Naanzaje arashinjwa na benshi ko yaba yarayishishuye Otile Brown w’umunya-kenya ku ndirimbo ye yitwa Such Kinda Love yafatanyije na Jovial.
Abafana bagiye bagaragaza uburyo indirimbo zombi zisa cyane.
Iyi ntabwo ari inshuro ya mbere Platnumz ashinjwa kwigana ibihangano by’abandi bahanzi, mu mwaka wa 2019, Diamond Platnumz ubusanzwe witwa Naseeb Abdul yashinjwe ko indirimbo ye “The One” yayibye umuririmbyi w’umunya-Namibia King TeeBee.
Si ibyo gusa kuko amashusho y’indirimbo “Tetema” Diamond yakoranye na Rayvanny nawe ubarizwa muri Wasafi yibasiwe cyane kubera uburyo akozwe nk’ayindirimbo ‘See You Again’ yasohowe n’umunyamerika Tyler The Creator.
Mu mwaka wa 2020, Diamond Platnumz n’umunyakenya-kazi Tanasha Donna bagarutsweho cyane kuko mu mashusho y’indirimbo yabo “Gere” biganye cyane amashusho y’indi ndirimbo yitwa Brisa y’umuhanzi wo muri Brazil witwa Iza.
Hadaciye igihe, Diamond yasohoye indi ndirimbo yamamaye cyane yise Jeje, nkuko byagarutsweho na benshi, amashusho yayo ameze kimwe nk’ayo mu ndirimbo ya Wiz-Kid yitwa Joro.
Tega amatwi indirimbo zombi utubwire (mu mwanya w’ibitekerezo; ahagana hasi) nimba koko zimeze kimwe cyangwa nimba ari amagambo.