Abanya-Hungary ibihumbi bahuriye mu myigaragambyo mu mujyi wa Budapest bamagana ikoreshwa rya Pegasus, porogaramu ikoreshwa mu butasi, bikekwa ko ikoreshwa na leta mu kugenzura bamwe mu banyagihugu.
Abigaragambya bahuriye ku rwibutso rusigasira abazize ubwicanyi bwakozwe n’Abanazi na leta yagenderaga ku matware ya gikomunisime(Communism), ndetse bakomeza bakora urugendo rugana ku kicaro cy’ishyaka rya Fidesz party riri ku butegetsi muri Hungary(soma Hongariya).
Abaturage barakajwe cyane n’uko leta yabo iri kwitwara nk’abanyagitugu bayoboye iki gihugu mu myaka 40 nyuma y’intambara ya 2 y’Isi.
Umwe mu bigaragambya yagize ati “Iyi myitwarire ya leta iratwibutsa ubunyagitugu, igihugu cyacu kigobotoye ibihugu by’iburengerazuba, gusa kiri kwigana iby’iburasirazuba.”
Leta ya Hungary isanzwe ifitanye ibibazo n’ibindi bihugu byo mu muryango w’ibihugu by’i Burayi kubera kutubahiriza demokarasi, nta kindi iratangaza kuri iyi ngingo, ikomeza kuvuga ko ikoresha iri porogaramu (Pegasus) mu butasi kandi byemewe n’amategeko.
Hari amakuru avuga ko abantu 17, byagaragaye ko bakurukiranwa na Pegasus binyuze kuri telephone zabo zigendanwa.
Muri aba, higanjemo abanyamakuru, abanyemari, abanyamategeko ndetse n’abatavuga rumwe na leta ya Hungary, ibi byazamuye umwuka mubi hagati ya leta n’abaharanira iyubahirizwa ry’amategeko muri Hungary.
Ikigo cya NSO gikora ndetse kikanagurisha iyi Porogaramu ya Pegasus giherereye muri Isiraheri, gitangaza ko Pegasus yagenewe za guverinoma z’ibihugu kugiza zirwanye iterabwoba n’ibyaha.
Mu gihugu cya Hungary cyategetswe n’abanyagitugu mu myaka 40 nyuma y’intambara y’Isi ya kabiri, Minisitiri w’ubutabera niwe wemeje ko Pegasus ikoreshwa mu butasi mu gucunga umutekano w’igihugu.
Bwana Miklos Hajnal, ubarizwa mw’ishyaka rya Momentum party ritavuga rumwe n’ubutegetsi ari naryo ryateguye iyi myigaragambyo yavuze ko ikoreshwa rya Pegasus muri Hungary ariyo mahano akomeye yabaye kuva iki gihugu kinjira mu murongo wa demokarasi muw’ 1990.
Source: Reuters