Umuhanzi Ngabo Medard uzwi nka Meddy muri Muzika yongeye kwandika amateka, aho indirimbo ye nshya yise “My Vow” yarebwe n’abarenga miriyoni ku rubuga rwa YouTube nyuma y’iminsi ibiri gusa isohowe.
Meddy ni umwe mu bahanzi bamaze imyaka myinshi bakora, ni umwe mu bakunzwe cyane mu Rwanda ndetse no mubindi bihugu byo muri Africa, ndetse indirimbo ze ziri mu zakunzwe cyane gusumba izindi kuri youtube mu Rwanda.
Iyi ndirimbo “My Vow”, yaje itegerejwe n’abantu benshi kuva yatangazwa, ndetse isohoka buri wese ashaka kuyireba no kuyumva, uretse kuba ifite amagambo meza y’urukundo, amashusho yayo agaragaza ubukwe bwe na Mimi bwabereye i Dallas, USA muri Gicurasi.
Iyi ndirimbo y’iminota 4 n’amasegonda 2, imaze kurebwa n’abangana na 1,060,000 kuri youtube mugihe iyi nkuru yandikwaga, ndetse uyu mubare uri kwiyongera vuba cyane. ubwo twandikaga iyi nkuru, iyi ndirimbo ntirasohoka ku rubuga rwa Spotify.
Meddy w’imyaka 31, ntawashidikanya ko ariwe muhanzi ukomeye mu Rwanda; niwe muhanzi ufite indirimbo yarebwe cyane aho indirimbo ye “Slowly” imaze kurebwa n’abarenga 52, kandi niwe muhanzi wenyine mu Rwanda ufite indirimbo yumviswe inshuro miriyoni 3 kuri Spotify.
Meddy n’umufasha we Mimi Mehfira ukomoka muri Ethiopia, barushinze kuwa gatandatu taliki ya 22 Gicurasi 2021, mu bukwe bwabereye mu mujyi wa Dallas muri Leta zunze ubumwe za Amerika.
Bwitabiriwe nabatari benshi kubera kwirinda ikwirakwizwa ry’icyorezo cya Covid-19, gusa bwitabiriwe n’ibyamamare bya hano mu Rwanda no mu karere, harimo nka The Ben wanaririmbyemo.