Uyu munsi taliki ya (23 Nyakanga 2021) mu mujyi wa Tokyo mu Buyapani hatangijwe ku mugaragaro imikino ya Olympics 2020 izasozwa kuwa 8 Kanama 2021.
Ubwo iyi nkuru yandikwaga, Isi yose ihanze amaso mu gihugu cy’Ubuyapani mu mujyi wa Tokyo, ahagiye kubera imikino ya Olympics igiye kuba mu bihe bidasanzwe aho Isi ihanganye n’icyorezo cya Covid-19.
Uyu munsi umwami w’abami w’Ubuyapani, Naruhito, yatangije ku mugaragaro Olympics 2020, amabendera ya Olympics ahita amanikwa iruhande rw’ayubuyapani.
Kimwe mu byashishikaje abantu, ni akarasisi kakozwe n’abavuye mu bihugu birenga 200 byo hirya no kw’Isi harimo n’u Rwanda ruzaba rwitabiriye iyi mikino ku nshuro yarwo ya 10 zikurikiranyije.
Ku musozo w’ibirori, utudege duto tutagira abapilote tuzwi nka Drones turenga 1800 twoherejwe mu kirere mu myiyereko dukora ishusho y’umubumbe w’Isi.
Ntago ariko abantu bose bishimiye Olyimpics, kuko hanze ya sitade hari huruye abigaragambya bamagana Olympics, baragira bati imikino ya Olympics ihagarare kuko izashira ubuzima bwa benshi mu kaga ko kwandura no gukwirakwiza icyorezo cya Covid-19 kimaze kwica abatari bake muri kiriya gihugu.
Ibi birori byabereye kuri sitade isanzwe yitwa Japan National Stadium gusa yahinduriwe izina yitwa Olympic Stadium ikaba ari imwe mu ziteganijwe mu kwakira Olympics 2020.
