Umuhanzi w’umunyarwanda , Mugisha Benjamin , wamenyekanye nka The Ben mu muziki , ukorera umuziki we muri leta zunze ubumwe za America yakiriwe nk’umwami mu gihugu cy’u Burundi nyuma yo kugera muri iki gihugu aho agiye gukorera ibitaramo bigera kuri bibiri.
Ku mugoroba wo kuri uyu wa gatatu , tariki 27 Nzeri 2023 , Mugisha Benjamin wamenyekanye nka The Ben mu muziki ari kumwe n’umugore we Uwicyeza Pamela , akaba aribwo yageze ku kibuga cy’indege mpuzamahanga cya Bujumbura , I Burundi.
The Ben , ubwo yageraga I Burundi , akaba yasanze imbaga nyamwinshi y’abantu batandukanye bari bamutegereje ariko by’umwihariko ibitangazamakuru byo muri iki gihugu cy’u Burundi ndetse nibyo mu mahanga utibagiwe n’abarundi banshi bashakaga kureba uyu muhanzi.
Nyuma yo kugera mu mujyi wa Bujumbura , The Ben akaba yaganiriye n’itangazamakuru ndetse atemberezwa ibice bigize umujyi wa Bujumbura mbere y’uko yerekeza muri hotel agomba gucumbikamo mugihe azaba yitegura gukora ibitaramo bigera kuri bibiri azakorera muri iki gihugu cy’u Burundi.
The Ben , akaba afite ibitaramo bigera kuri bibiri azakorera muri iki gihugu cy’u Burundi aho igitaramo cya mbere azagikora tariki 30 Nzeri 2023 , mugihe igitaramo cye cya kabiri azagikora tariki 1 Ukwakira 2023 , byose akaba ari ibitaramo bizabera mu mujyi wa Bujumbura.
Leta y’u Burundi ikaba yarahaye umugisha ibi bitaramo bya Mugisha Benjamin wamenyekanye nka The Ben ndetse ubwo yageraga muri iki gihugu akaba yakiriwe n’umukuru w’umujyi wa Bujumbura aho abashinzwe umutekano w’umujyi aribo bari barinze uyu muhanzi.
