General Muhoozi Kainerugaba yasabye imbabazi Perezida William Ruto w’igihugu cya Kenya , bitewe n’amagambo yari aherutse gutangaza yifashishije urubuga rwe rwa Twitter , ubundi agateza umwuka mubi hagati y’ibihugu byombi Kenya na Uganda.
Kuwa kane , yifashishije urubuga rwe rwa Twitter nanone akaba aribwo Muhoozi yongeye kwandikaho asaba imbabazi ati ” ntakibazo ntigeze ngirana na afande William Ruto niba narakoze ikosa ahari hose musabye imbabazi ambabarire nka murumuna we , Imana ihe umugisha EAC”.
Minisitiri w’ubuhinzi muri Uganda ndetse akaba n’inshuti yakadasohoka ya General Muhoozi , nyuma y’ubu butumwa akaba yarashimiye Muhoozi uburyo yasabye imbabazi mu ruhame , amushimira ku kuba ashyize umucyo kubyaba byarumvikanye nabi ndetse avugako kubwe azi neza aho ubunshuti bwa Perezida Ruto na Muhoozi bugeze.
Mu minsi ishize akaba aribwo Muhoozi yakije umuriro hagati y’ibihugu byombi Kenya na Uganda , ubwo yatangazagako Uhuru Kenyatta yagomba kuba yarahinduye itegeko nshinga ry’igihugu cya Kenya maze akiyamamariza Manda ya gatatu yo kuyobora iki gihugu cya Kenya.
Ubu butumwa bwa Muhoozi bukaba bwarafashwe nk’ubutumwa bugamije kwibasira Perezida William Ruto uherutse gutorerwa kuba Perezida w’igihugu cya Kenya asimbuye Perezida wari ucyuye igihe bwana Uhuru Kenyatta , wari umaze imyaka 10 ayoboye igihugu cya Kenya.
Ni mugihe kandi Muhoozi yashyizeho ubu butumwa ntagihe cyari gishize yanditseko ingabo za Uganda byazitwara ibyumweru bibiri gusa zikaba zafashe umujyi mukuru w’iki gihugu cya Kenya , Nairobi , ndetse akaba ari ubutumwa bwatumye Perezida Museveni asaba imbabazi abaturage b’igihugu cya Kenya.