Lionel Messi, Rutahizamu wa Paris Saint Germain ni umwe mu bakinnyi bane b’iyi kipe byamenyekanye ko bamaze kwandura COVID-19 kuri iki cyumweru.
Abandi bakinnyi barwaye COVID-19 ni Juan Bernat, Sergio Rico na Nathan Bitumazala. Nk’uko ubuyobozi bw’ikipe bwabitangaje, abanduye bose bahise bajyanwa mu kato nkuko biteganywa n’amabwiriza yo kwirinda iki cyorezo cya COVID-19.
Ibi bibaye mu gihe iyi kipe yiteguraga guhura n’ikipe ya Vannes mu mikino y’igikombe cy’ubufaransa ku mukino wa 32 kuri uyu wa mbere. Ni mu gihe kandi muri iki gihugu cy’Ubufaransa ubwandu bwa COVID-19 bwiyongereye cyane aho habaruwe ubwandu bushya bugera kuri 232,200 kuwa gatanu honyine, akaba ariwo mubare munini ugaragaye mu munsi umwe ku mugabane w’ i burayi kuva icyorezo cyatangira.
Kuva yagera muri PSG avuye muri FC Barcelona, Messi amaze gutsindira PSG igitego kimwe gusa muri shampiyona y’ubufaransa, ndetse n’ibitego 5 yatsinze mu mikino itanu ya Champion’s League.
Mu kwezi k’Ugushyingo nibwo Messi yakoze amateka yegukana igihembo cya Ballon D’or ku nshuro ya karindwi, aba umukinnyi wenyine ubikoze dore ko akurikirwa na Cristiano Ronaldo umaze kwegukana iki gikombe inshuro 5