Umugabo w’imayaka 30 yasimbutse asohoka mu ndege ubwo yari igiye guhaguruka ku kibuga cy’indege cya ‘Sky Harbor’ muri leta ya Arizona ho muri Leta Zunze Ubumwe za Amerika.
Umuvugizi wa sosiyete y’ubwikorezi bwo mu ndege ya ‘Southwest Airlines’ yatangaje ko ubwo indege yarimo yitegura guhaguruka, umwe mu bagenzi yasohotse anyuze muri umwe mu miryango yari ifunguye, umupilote ahita ahagarika indege, ahamagara abashinzwe umutekano w’ikibuga cy’indege. Kugera ubu ntibirasobanuka neza impamvu uyu muryango wari ufunguye.
Ntibirasobanuka neza uburyo uyu mugabo yasimbutse mu ndege, ndetse n’impamvu yabyo.
Uyu mugabo akimara gusohoka yahise ajya mu kigo gicumbikira abashinzwe kuzimya umuriro yifungiranyamo. nyuma yo gufungurirwa, yahise yerekezwa ku bitaro biri hafi kugira ngo avurwe ibikomere yari afite byatewe no gusimbuka indege.
Polisi ya Phoenix yatangarije CNN yo yamenyeshejwe aya makuru ndetse ubu hari gukorwa iperereza, ntabwo birasobanuka neza niba uyu mugabo ashobora gukurikiranwaho ibyaha.