Manchester United yamaze kwemeza ko Cristiano Ronaldo agiye kugaruka muri iyi kipe, ariyo yamugize uwo ariwe.
Ronaldo yitezwe gusinyana na Manchester United amasezerano y’imyaka ibiri nyuma yo guhabwa visa no gukora amasuzuma y’umubiri.
Amakuru avuga ko Manchester United na Juventus FC byamaze kwemeranya ko hazishyurwa miliyoni 20 z’amayero hiyongereyeho na miliyoni 3 z’uduhimbazamusyi.
Kugera uyu munsi mu gitondo, Manchester City niyo yari kw’isonga mu kwegukana uyu rutahizamu, umwe mu bakinnyi b’ibihe byose. ariko mu masaha 48 gusa, uhagarariye Ronaldo Jorge Mendes yavuganye n’abayobozi ba Juventus mu mujyi wa Turin mu butariyani, bavugana kubyerekeye mu kuba Ronaldo yajya mu ikipe ya Manchester City nayo yaje kwemeza uyu munsi ko itakiri mw’irushanwa ryo kumwegukana.
Ibi byahuriranye nuko Mendes yari yamaze kugirana ibiganiro n’ikipe ya Manchester United nayo ubu yamaze kwemeza ko yamaze kwemeranya na Juventus ko igiye kwisubiza uyu mukinnyi wari warayikiniye imyaka ishize akiri muto nyuma akajya muri Real Madrid kuri miliyoni 80 z’amayero.
Manchester United ku rubuga rwayo yagize iti “Manchester United yishimiye ko yamaze kwemeranya n’ikipe ya Juventus kubwa ‘transfer’ ya Cristiano Ronaldo, amasezerano ashingiye ku mpamvu ze(Ronaldo) bwite, visa ndetse n’amasuzuma y’ubuzima”.
Cristiano Ronaldo yari asigaje igihe kiri munsi y’umwaka ku masezerano yo gukinira Juventus afite agaciro ka miriyoni 31 z’amayero.
Mu kiganiro n’itangazamakuru mbere y’umukino wahuje Man United na Wolves, umutoza Solskjær wa Man United, yaciye amarenga ko iri kugerageza kwegukana Ronaldo, yanatangaje ko umukinnyi we Bruno Fernandes ari kuvugana na Ronaldo banakina mu ikipe imwe y’igihugu ya Portugal.
Umutoza Pep Guadiola utoza Manchester City akaba yaranatoje Cristiano Ronaldo mu ikipe ya Real Madrid yatangaje abakinnyi aribo bihitiramo amakipe bifuza gukinira ndetse ko azakomeza kwita ku bakinnyi afite ubu.
Umutoza mukuru wa Juventus Massimiliano Allegri nawe yatangaje ko yamenyeshejwe iby’igenda rya Ronaldo mbere y’urugendo rw’ikipe igiye guhura na Empoli, akaba ariyo mpamvu atashyizwe ku rutonde rw’abakinnyi bazitabira.