Kuri uy’umunsi , nibwo umukuru w’igihugu Perezida Paul Kagame yageze mu gihugu cya Guinea Bissau mu ruzinduko rwe rw’akazi rw’umunsi umwe , nyuma yo kuva mu gihugu cya Benin aho yagiriye ur’uruzinduko rwe rw’akazi rw’iminsi igera kuri ibiri.
Nyuma yo kugera mu gihugu cya Guinea Bissau , Perezida Paul Kagame akaba yagiranye ibiganiro na mugenzi we w’igihugu cya Guinea Bissau Perezida Umaro Sissoco Embaló byabereye mu muhezo ubundi bikurikirwa n’ibindi biganiro byaba bakuru b’ibihugu byombi byarimo n’intumwa z’ibihugu byombi.
Muri ur’uruzinduko kandi Perezida Paul Kagame na Perezida Umaro Sissoco Embaló , bakaba bahagarariye umuhango wo gusinya amasezerano y’ubufatanye hagati y’ibihugu byombi u Rwanda na Guinea Bissau , mu nzego zitandukanye z’ibihugu byombi.
Perezida Paul Kagame na Perezida Umaro Sissoco Embaló kandi bikaba biteganyijweko bazakora ikiganiro n’itangazamakuru kizagaruka ku mubano w’ibihugu byombi ndetse n’ubufatanye mu nzego zitandukanye z’ibihugu byombi , u Rwanda na Guinea Bissau.
Muri ur’uruzinduko Perezida Umaro Sissoco Embaló akaba yambitse umudari Perezida Paul Kagame uzwi nka “Amilcar Cabral Medal” , akaba ari umudari w’icyubahiro muri ik’igihugu cya Guinea Bissau wambikwa aba Perezida b’ibihugu by’inshuti z’igihugu cya Guinea Bissau.
Umukuru w’igihugu Perezida Paul Kagame , akaba azasoza uruzinduko rwe rw’akazi rw’umunsi umwe yagiriraga muri ik’igihugu cya Guinea Bissau akomereza uruzinduko rwe rw’akazi mu gihugu cya Guinea aho azahura na Perezida w’inzibacyuho w’iki gihugu , Col . Mamady Doumbouya nawe uherutse kugirira uruzinduko rwe rw’akazi mu Rwanda , mu myaka ishize.
