Mu gitondo cyo kuri uyu wa kane nibwo ibiro by’umukuru w’igihugu Perezida Paul Kagame , byatangajeko yakiriye umunyamabanga wa America Antony Blinken mu biro bye , bagirana ibiganiro byibanze ku kurushaho kunoza ubufatanye hagati y’ibihugu byombi , ndetse n’ikibazo cy’umutekano wo mu karere k’ibiya bigari.
Ariko mu kiganiro n’itangazamakuru , umunyamabanga wa America ushinzwe ububanyi n’amahanga Bwana Antony Blinken we yavuzeko yagize n’amahirwe yo kubaza Perezida Paul Kagame ku kibazo cya Paul Rusesabagina , wakatiwe igifungo cy’imyaka 25 nyuma yo guhamwa n’ibyaha by’iterabwoba byakorewe ku butaka bw’u Rwanda.
Muri iki kiganiro n’itangazamakuru , Antony Blinken yavuzeko America yo yerekanye aho ihagaze kuri iki kibazo cya Rusesabagina gikomeje kuba inzigo hagati y’umubano w’ibihugu byombi ndetse U Rwanda rukaba rwaratangajeko Rusesabagina ari icyihebe cyakoze ibyaha kandi kigomba kubiryozwa , America yo ikamwita intwari bitewe na filimi mbarankuru “Hotel Rwanda Hero” yakinnyemo.
Antony Blinken akaba yaravuzeko iki kibazo ya kiganiriyeho n’umukuru w’igihugu Paul Kagame ariko atari ibintu yakinjiramo cyane ndetse avuzeko ari ibintu bazakomeza gukurikirana , ni mugihe mu kiganiro yari yagiranye n’itangazamakuru mbere yuko agera mu Rwanda yari yavuzeko iki mujyanye mu Rwanda ari ugushyira ku gitutu Perezida Paul Kagame akarekura Rusesabagina.
Ni mugihe Perezida Paul Kagame ku munsi wejo abinyujije ku butumwa yasubije ku gitekerezo cyari cyatanzwe ku rubuga rwa Twitter , yakuriye inzira ku murima abumvako U Rwanda ruzafungura Rusesabagina kubera igitutu cya America ndetse ibi bikaba byarongeye gushimangirwa na Minisitiri w’ububanyi n’amahanga w’u Rwanda , Dr Vincent Biruta.
Minisitiri Biruta , akaba yaravuzeko Paul Rusesabagina ari umunyabyaha wakatiwe n’inkiko gufungwa kandi ko uzakomeza gufungwa hatitawe ku gitutu cy’amahanga arimo na America bakomeje gushyira ku Rwanda ngo rumufungure nk’umwere ndetse avugako ibyo ari ibintu bidashoboka ku gihugu nk’u Rwanda.
Muri iki kiganiro kandi Blinken akaba yaravuzeko mu minsi mike ishize yabashije kuvugana nabo mu muryango wa Paul Rusesabagina ariko avugako ko atabashije kuvugana n’abagizweho n’ingaruka z’ibitero by’iterabwoba umutwe FNL wa Rusesabagina wagabye mu Rwanda , mu ruzinduko rwe rwa kazi yagiriye mu Rwanda.
